Қазақстанның Азаматтық альянсы құрылған «Адал азамат – белсенді қоғам» орталығы аясында ҮЕҰ мен белсенді азаматтарға арналған ақпаратты ұсынады:

Өңірлерден жаңалықтар

Жетісу облысының Алакөл ауданында ата-аналарға арналған «Отбасы — ұлттық құндылықтар мен дәстүрлердің алтын бесігі» семинар-тренингі өтті, ал Көксу ауданында «Тазалық өзіңнен басталады» экологиялық суреттер байқауы ұйымдастырылды.

Түркістан қаласында жастар арасында «Менің таңдауым — адалдық» зияткерлік ойыны және «Заң және тәртіп» қағидаты аясында ҮЕҰ өкілдерінің қатысуымен дөңгелек үстел өтті. Талдықорған қаласында «Ашық есік — ашық диалог» ашық есік күні ұйымдастырылды.

Қызылорда қаласында жаңа форматтағы әлеуметтік көмек жүйесін түсіндірудегі ҮЕҰ-ның рөліне арналған дөңгелек үстел өтті. Жетісу облысындағы «Алтын-Емел» ұлттық паркінің аумағында «Алтын Емел — құландар мекені» этнотарихи фестивалі, ал Алматы қаласында «Алғашқы қадамдар» республикалық онлайн фестиваль-байқауы өтті.

Заңнамалық бастамалар

2027 жылдан бастап отбасылардың әлеуметтік әл-ауқатын бағалаудың жаңа әдістемесі қолданысқа енгізіледі

2027 жылғы 1 қаңтардан бастап Қазақстанда әлеуметтік көмектің жекелеген түрлерін тағайындау кезінде отбасылардың әлеуметтік әл-ауқатын бағалаудың жаңа әдістемесі күшіне енеді. Ол материалдық жағдайды алты бағыт бойынша сипаттайтын 59 көрсеткішті талдауды көздейді: табыс пен жұмыспен қамту, кредиттер, мүлік, көлік, кәсіпкерлік және ауыл шаруашылығы. Деректер анықтамалар жинау қажеттілігінсіз мемлекеттік дерекқорлардан алынады.

Бағалау балалардың, қарт адамдардың және мүгедектігі бар адамдардың жағдайын қоса алғанда, отбасының әлеуметтік құрамын ескере отырып, бүкіл үй шаруашылығы деңгейінде жүргізіледі. Бұл ретте республикалық бюджеттен көрсетілетін әлеуметтік көмектің 36 түрінің 22-сіне қатысты бұрынғы тағайындау тәртібі сақталады. Жаңа әдістеме 2023 жылдан бері қолданылып келе жатқан әдістеменің орнына енгізіледі.

Талдау және статистика

ҮЕҰ-ның едәуір бөлігінің мемлекеттік қаржыландыруға тәуелділігі ең өзекті мәселелердің бірі болып қала береді.

Қолдаудың негізгі құралдары:

• мемлекеттік әлеуметтік тапсырыс;

• мемлекеттік гранттар;

• мемлекеттік сыйлықтар;

• қайырымдылық;

• демеушілік қолдау;

• халықаралық гранттар;

• әлеуметтік кәсіпкерлік;

• ақылы әлеуметтік қызметтер.

Азаматтық қоғамды дамыту тұжырымдамасында да қаржыландыру көздерін әртараптандыру, оның ішінде ҮЕҰ базасында әлеуметтік кәсіпкерлікті дамыту көзделген.

Негізгі міндет — ҮЕҰ-ның «жоба аяқталды — қаржыландыру тоқтады» моделінен бір ғана қаржы көзіне тәуелді болмай, өз қызметін тұрақты жалғастыра алатын орнықты ұйым моделіне біртіндеп көшуі.