«Мемлекеттік рәміздер: біріктіруші күш және заманауи маңызы» тақырыбындағы «ҰСТАНЫМ» пікірталас клубының ұсынымдары.

2025 жылғы 3 маусымда Қазақстанның Азаматтық Альянсы «ҰСТАНЫМ» Ұлттық пікірталас клубының «Мемлекеттік рәміздер: біріктіруші күш пен заманауи мағына» атты отырысын өткізді. Іс-шара Мемлекеттік рәміздер күніне орай ұйымдастырылды.

Қатысушылар қазіргі кезеңде мемлекеттік рәміздерге деген құрмет арқылы отансүйгіштік сезімнің күшейіп келе жатқанын атап өтті. Талқылау нәтижесінде келесі ұсыныстар әзірленіп, мемлекеттік органдарға жолданды:

🔹 1. Жеке геральдикалық жүйені қалыптастыру.
– Қазақстан геральдистер одағын және Мәдениет және ақпарат министрлігі жанынан геральдикалық комиссия құру;
– мемлекеттік органдарда геральдист мамандарды енгізу;
– Қазақ ұлттық өнер университетінде геральдика кафедрасын ашу.

🔹 2. Қалалардың елтаңбалары бейнеленген пошта маркаларының коллекциясын әзірлеу және шығару.
Бұл ұсыныс Қазақстан брендін танымал етуге және аймақтардың бірегейлігін насихаттауға ықпал етеді.

🔹 3. Ұлттық рәміздер жүйесін кеңейту.
– ұлттық ұранды енгізу;
– ұлттық дыбыстық белгіні қалыптастыру.
Бұл қадамдар мемлекеттік рәміздердің тұтас жүйесін толықтыра түседі.

🔹 4. Мемлекеттік рәміздерге қатысты қоғамдық пікірді тұрақты түрде мониторингтеу.
Әлеуметтік сауалнамалар арқылы халықтың көзқарасын зерттеу ұсынылды.

🔹 5. Мемлекеттік рәміздерді дәріптеуге арналған білім беру және медиа бағдарламаларын әзірлеу.
– мектептер мен ЖОО-ға арнайы оқу модульдерін енгізу;
– әлеуметтік желілерге бейнематериалдар әзірлеу;
– жастар арасында байқаулар мен челлендждер ұйымдастыру.