Мемлекет басшысы Ұлттық құрылтайда ҮЕҰ рөлін ерекше атап өтті

Күні кеше Бұрабайда өткен Ұлттық құрылтайдың IV-отырысында Президент азаматтық қоғам мен үкіметтік емес ұйымдардың (ҮЕҰ) ел дамуына қосқан үлесін жоғары бағалады. Мемлекет басшысы атап өткендей, ҮЕҰ – халық пен билік арасындағы сенімді диалогтың басты көпірі. Сонымен қатар, бірнеше маңызды бағытты жетілдіру қажеттігі айтылды:

• Мемлекеттік әлеуметтік тапсырысты жетілдіру

Мемлекет пен ҮЕҰ-ның нәтижелі әріптестігін қалыптастыру үшін мемлекеттік әлеуметтік тапсырысты оңтайландыру қажеттігі айтылды. Осы мақсатта қоғамдық ұйымдар мен сарапшылардың қатысуымен арнайы заң әзірлеу тапсырылды.

• Әлеуметтік жобаларға қолдау көрсету

Қоғамның өзекті мәселелерін шешуде ҮЕҰ-ның белсенділігі маңызды. Президенттің бастамасымен заңсыз шығарылған активтерден қайтарылған қаражаттың бір бөлігі әлеуметтік нысандарды дамытуға жұмсалады. Бұл ҮЕҰ-ларға әлеуметтік қызмет көрсету аясын кеңейтуге мүмкіндік береді.

• Қоғамдағы өзекті мәселелерді шешу

Президент қайырымдылықты теріс пайдалану, ақпараттық алаяқтық және жалған коучерлер мәселелеріне назар аударды. Осы бағытта ҮЕҰ-лармен бірлесіп жұмыс жүргізу қажеттігі айтылды.

• Әйелдер мен балаларды қорғау

Әйелдер колонияларындағы жағдайды жақсарту, кәмелетке толмаған балалары бар әйелдерді әлеуметтік қорғауды күшейту тапсырылды. Бұл бағытта ҮЕҰ-лар маңызды рөл атқара алады.

Президенттің бұл бастамалары ҮЕҰ-лар үшін жаңа мүмкіндіктер ашады. Мемлекет азаматтық қоғам институттарымен ынтымақтастықты күшейтуге дайын екенін көрсетті.