«Ауылдағы азаматтық бастамаларды дамыту» жобасы аясындағы шағын гранттар байқауының жеңімпаздарымен алғашқы таныстыру онлайн-кездесуі өтті.

Кездесу барысында қатысушылар жобаларды іске асырудың негізгі талаптарымен, шарттарды жасасу тәртібімен, бағдарламалық және қаржылық есептілікті дайындау ережелерімен, ақпараттық сүйемелдеу талаптарымен, сондай-ақ конкурс ұйымдастырушыларымен өзара іс-қимыл тетіктерімен танысты.

Жобалардың мақсатты көрсеткіштерін сақтау, өткізілген іс-шаралар бойынша растайтын құжаттарды жинақтау, міндетті визуалды атрибутиканы пайдалану және есептілікті уақытылы ұсыну мәселелеріне ерекше назар аударылды.

Кездесу грант иегерлерін бастамаларды тиімді жүзеге асыруға дайындаудың және жоспарланған нәтижелерге сапалы қол жеткізуді қамтамасыз етудің маңызды кезеңі болды.

Байқау жеңімпаздарын жобаларды іске асыру жұмыстарының басталуымен құттықтаймыз және ауылдық аумақтарды дамытуға, жергілікті қауымдастықтарды қолдауға және ауыл тұрғындарының өмір сүру сапасын арттыруға бағытталған әлеуметтік маңызы бар бастамаларды табысты жүзеге асыруларына тілектеспіз.