Қазақстанның Азаматтық альянсы «Адал азамат – белсенді қоғам» орталығы аясында ҮЕҰ мен белсенді азаматтардың мүддесі үшін хабарлайды:

Өңір:

Өткен аптада Қазақстан өңірлерінде отбасыларды қолдау, жастарды дамыту, цифрландыру және ҮЕҰ әлеуетін арттыру бағыттарында бірқатар қоғамдық бастамалар жүзеге асырылды.

Батыс Қазақстан облысында «Берекелі отбасы – бақытты болашақ» жобасының қорытынды кездесуіне жас отбасылардың 30 өкілі қатысты. Абай облысында 36 оқушы мен студент «Үш анық» зияткерлік ойынында бақ сынады.

Атырау облысында ауыл мектеп оқушыларына арналған заманауи жабдықтармен, 3D-қаламдармен және робототехника мен бағдарламалауды үйренуге қажетті құралдармен жабдықталған «QADAM» робототехника кабинеті ашылды. Солтүстік Қазақстан облысында ҮЕҰ және азаматтық сектордың 20 өкілі БАҚ-пен және әлеуметтік желілермен жұмыс істеу бойынша оқудан өтті, ал тағы 30 қатысушы «Адал азамат – белсенді қоғам» жобасы аясындағы «Ашық есік күні» барысында консультациялар алды.

Заң:

2027 жылға арналған ең төменгі жалақы және АЕК: заң жобасы жарияланды

«2027–2029 жылдарға арналған республикалық бюджет туралы» Қазақстан Республикасы Заңының жобасы жарияланды. Заң жобасында 2027 жылғы 1 қаңтардан бастап:

1. ең төменгі жалақы мөлшерін — 85 000 теңге;
2. айлық есептік көрсеткішті — 4 693 теңге;
3. мемлекеттік базалық зейнетақы төлемінің ең төменгі мөлшерін — 38 622 теңге;
4. зейнетақының ең төменгі мөлшерін — 74 919 теңге;
5. базалық әлеуметтік төлемдер мөлшерін есептеу үшін ең төменгі күнкөріс деңгейінің шамасын — 55 173 теңге белгілеу көзделген.

Заң жобасында жасына байланысты зейнетақы төлемдеріне және еңбек сіңірген жылдары үшін зейнетақы төлемдеріне бағытталатын қаражат олардың мөлшерін 2027 жылғы 1 қаңтардан бастап 8,5 %-ға арттыру ескеріле отырып көзделген.

Сондай-ақ 2027 жылғы 1 қаңтардан бастап Мемлекеттік әлеуметтік медициналық сақтандыру қорына төленуге тиіс мемлекет жарналарының мөлшерін мемлекет жарналары есептелетін объектінің 2,2 %-ы көлемінде белгілеу ұсынылады.

Талдау:

Сарапшылардың пікірінше, 2026–2030 жылдары ҮЕҰ-ны сапалы дамыту үшін келесі шараларға назар аударған жөн:

Бірінші — мемлекеттік әлеуметтік тапсырысты жетілдіру.

Жекелеген іс-шараларды қаржыландырудан нақты әлеуметтік нәтижелерге қол жеткізуді қаржыландыруға көшу қажет.

Екінші — ұзақ мерзімді қаржыландыру үшін жағдай жасау.

Тұрақты жұмыс істейтін ұйымдар үшін көпжылдық гранттық және бағдарламалық қаржыландыру тетіктерін қарастырған жөн.

Үшінші — ҮЕҰ-ның әлеуметтік кәсіпкерлігін дамыту.

Бұл ұйымдарға өз кірістерін қалыптастырып, бюджетке тәуелділігін азайтуға мүмкіндік береді.

Төртінші — мемлекеттік функцияларды ҮЕҰ-ға беруді кеңейту.

Әсіресе әлеуметтік қызметтер, профилактика, ағарту және осал топтармен жұмыс салаларында.

Бесінші — қоғамдық бақылауды күшейту.

ҮЕҰ бюджет бағдарламаларына, мемлекеттік жобаларға және мемлекеттік қызметтердің сапасына мониторинг жүргізуге нақты мүмкіндікке ие болуы тиіс.

Алтыншы — өңірлік ҮЕҰ-ны дамыту.

Ауылдық елді мекендер мен шағын қалалардағы ұйымдарды қолдаудың арнайы жүйесі қажет.

Жетінші — әлеуметтік әсерді бағалау жүйесін енгізу.