2026 жылғы 31 қаңтарда Конституциялық комиссия Қазақстан Республикасының жаңа Конституциясының жобасын жариялады. Жобада бірқатар негізгі өзгеріс ұсынылған:

Бес жыл мерзімге пропорционалды жүйе бойынша сайланатын 145 депутаттан тұратын бір палаталы Құрылтай құру. Жаңа модель парламенттік өкілдік тетігі мен саяси партиялардың рөліне өзгерістер енгізуді көздейді.

Қазақстанның Халық Кеңесін — Қазақстан халқының мүддесін білдіретін жоғары консультативтік органды құру. Жоба бұл органға заң шығару бастамасы құқығын беруді көздейді.

Вице-президент институтын енгізу. Жобаға сәйкес, Вице-президент, атап айтқанда, Президент атынан Қазақстанның және шет мемлекеттердің қоғамдық-саяси, ғылыми және мәдени-ағартушылық ұйымдарымен өзара іс-қимыл жасайды.

Азаматтардың құқықтары мен құқықтық кепілдіктерін күшейту. Адвокатура мен адвокаттық қызметке арналған жеке бап енгізу, зияткерлік меншік құқығын қорғау, азаматтардың жағдайын нашарлататын заңдардың кері күшіне жол бермеу, кінәсіздік презумпциясы және бір құқық бұзушылық үшін қайта жауапқа тартуға жол бермеу қағидаттарын бекіту ұсынылады.

«Миранда ережесі» жеке норма ретінде бекітіледі — адам ұсталған кезде оған құқықтары түсіндірілуі тиіс.

Конституцияның терминологиялық аппараты жаңартылып, стратегиялық басымдықтар ретінде адами капиталды, білім беруді, ғылым мен инновацияларды дамыту айқындалады.