Қазақ
Алматы қаласы
Алматы қаласының балалар құқықтарын қорғау жөніндегі ведомствоаралық мониторинг тобы Қоғамдық кеңес мүшелерімен және қоғамдық ұйымдардың өкілдерімен бірлесіп, жаңа оқу жылы қарсаңында ауқымды мониторинг жүргізуде.
Қаланың әр ауданында құрылған 8 мобильді топ білім беру ұйымдарының жағдайын құжаттар негізінде ғана зерделеп қоймай, олардың балалар үшін нақты қауіпсіздігін, қолжетімділігін және оқу процесіне дайындығын жан-жақты бағалауда.
Тексеру барысында терроризмге қарсы қауіпсіздік, бейнебақылау камераларының «соқыр аймақтарсыз» жұмыс істеуі, күзет қызметкерлерінің іс-қимыл алгоритмдері, мектеп аумағының жағдайы мен электр қауіпсіздігі, люктердің жабық болуы, ерекше қажеттіліктері бар балалар үшін пандустар мен тұтқалардың қолжетімділігі, сондай-ақ көмек алу үшін арналған «QR-111» ақпараттық тақтайшаларының дұрыс орналастырылуы қатаң бақылауда.
Анықталған барлық ескертулер тіркеліп, жауапты тұлғаларға оларды жедел жою бойынша нақты ұсынымдар берілді.
Бұл жұмыс ерекше бақылауда және жүйелі түрде жалғастырылатын болады.