«ҰСТАНЫМ» пікірталас клубының кезекті отырысы

Бүгін Қазақстанның Азаматтық Альянсы ұйымдастырған «ҰСТАНЫМ» пікірталас клубының кезекті отырысы өтті. Күн тәртібіндегі негізгі тақырып – үкіметтік емес ұйымдар туралы заң жобасы болды.  Отырысқа сарапшылар, ҮЕҰ басшылары, мемлекеттік органдардың өкілдері, аналитиктер мен заңгерлер қатысты. Заң жобасының басты ережелері, атап айтқанда, ҮЕҰ-дың құқықтық мәртебесі, мемлекеттік қолдаудың қағидаттары, есептілік пен ашықтық мәселелері, сондай-ақ мемлекет пен үшінші сектор арасындағы өзара іс-қимыл тетіктері кеңінен талқыланды.  Қатысушылар заң жобасының шектеу құралына айналып кетпеуі, керісінше, үкіметтік емес ұйымдардың одан әрі дамуына және институционалдық нығаюына ықпал етуі қажет екенін атап өтті. Құжаттағы бірқатар тұжырымдарды нақтылауға қатысты нақты ұсыныстар айтылды.  Қазақстанның Азаматтық Альянсы ашық диалогтың маңыздылығын атап өтіп, елдегі азаматтық қоғамды дамытуға бағытталған өзекті мәселелерді талқылауға арналған алаңдарды ұйымдастыруды жалғастырады.