Қазақстан Республикасының «Үкіметтік емес ұйымдар туралы» заң жобасын қоғамдық талқылау өтеді

2026 жылғы 6 қарашада сағат 15:00-де Астана қаласында Қазақстан Республикасының «Үкіметтік емес ұйымдар туралы» заң жобасын қоғамдық талқылау өтеді.

Іс-шараны өткізу үкіметтік емес ұйымдардың қызметін құқықтық реттеуді жетілдіру мәселелерінің өзектілігіне, сондай-ақ мемлекеттік органдар, азаматтық қоғам өкілдері мен сарапшылар қауымдастығы арасында ашық әрі сындарлы диалог орнату қажеттілігіне байланысты.

Қоғамдық талқылаудың негізгі мақсаты – заң жобасының ережелерін жан-жақты қарастыру, ұсынылып отырған өзгерістерді талдау және олардың үкіметтік емес ұйымдардың қызметіне, сондай-ақ Қазақстанның азаматтық секторын одан әрі дамытуға ықтимал әсерін бағалау.

Қоғамдық талқылау әлеуметтік бағыттағы үкіметтік емес ұйымдардың, қоғамдық бірлестіктер мен сарапшылар қауымдастығы өкілдерінің қатысуымен өткізіледі.

Іс-шара барысында заң жобасының негізгі ережелерін, оны іске асырудың көзделіп отырған тетіктерін, сондай-ақ үкіметтік емес ұйымдар қызметінің құқықтық және ұйымдастырушылық жағдайларына қатысты мәселелерді талқылау жоспарлануда.

Қоғамдық талқылау заңнамалық бастамаларды қарау кезеңінде ашық пікір алмасуға және мүдделі тараптардың ұстанымдарын ескеруге мүмкіндік беруді көздейді.

Қоғамдық талқылау қорытындысы бойынша келіп түскен ескертулер мен ұсыныстар жүйеленіп, заң жобасының ережелерін жетілдіру мақсатында одан әрі қарауға жолданатын болады.