Президент азаматтық сектордың қоғамды дамытудағы және реформаларды іске асырудағы маңыздылығын атап өтті

Бүгін Бурабайда Ұлттық Құрылтайдың IV отырысы өтті, онда Президент азаматтық сектордың қоғамды дамытудағы және реформаларды іске асырудағы маңыздылығын атап өтті. Ол мемлекеттік әлеуметтік тапсырыс критерийлерін қайта қарау және ҮЕҰ туралы заңнаманы қабылдау туралы бастаманы қолдады.

«Құрылтай мүшелері Зүлфия Байсақова мен Бану Нұрғазиева мемлекеттік әлеуметтік тапсырыстың критерийлерін қайта қарау және үкіметтік емес ұйымдар туралы заңнаманы жетілдіру қажеттігін айтты. Азаматтық сектор реформаларды жүргізу және қоғамды дамыту ісінде маңызды рөл атқарады. Мемлекет пен үкіметтік емес ұйымдардың серіктестігі өзекті мәселелерді шешуге, жасампаз құндылықтарды дәріптеуге және ұлттың жаңа сапасын қалыптастыруға ықпал етеді. Сондықтан мемлекеттік әлеуметтік тапсырыстың тиімділігін арттыру үшін қазіргі заманның талаптарына сай келетін жеке заң керек. Әрине, заң жобасын әзірлеу барысында құжатқа терең және жан-жақты сараптама жасалуға тиіс. Құзырлы органдар сарапшылар мен қоғамдық ұйымдарды тарта отырып, бұл мәселемен айналысуы керек», — деп атап өтті Президент.

Азаматтық секторды мемлекеттік қолдау-қоғам мен билік арасындағы диалогты нығайтудағы маңызды қадам. Әлеуметтік бастамаларды қаржыландырудың жаңа тетіктері ҮЕҰ-ға өзекті мәселелерді тиімді шешуге және елдің тұрақты дамуына үлес қосуға көмектеседі деп күтілуде.