Қазақстан Республикасы Президентінің Жолдауын талқылау бойынша дөңгелек үстел: цифрландыру, экология және азаматтық қоғамды дамыту

15 қыркүйекте Қазақстанның Азаматтық Альянсы ұйымдастырған, Қазақстан Республикасы Президентінің Жолдауын жан-жақты талқылауға арналған дөңгелек үстел өтті. Іс-шара мемлекеттік органдар мен азаматтық қоғам өкілдерінің сындарлы диалогына арналған маңызды алаңға айналды. Оған Мәдениет және ақпарат министрлігінің өкілдері, сондай-ақ жетекші үкіметтік емес ұйымдар мен өңірлік Азаматтық Альянстардың басшылары қатысты.

Жиын барысында Жолдауда көрсетілген негізгі бағыттарға – цифрландыру мен экологиялық бастамаларға, азаматтық бірегейлікті нығайтуға, жастарды мемлекеттік және қоғамдық процестерге белсенді тартуға, сондай-ақ қоғамдық бақылау тетіктерін жетілдіруге айрықша назар аударылды. Спикерлер ҮЕҰ қызметіне цифрлық технологияларды енгізу тәжірибесі мен азаматтық бірлестіктердің мемлекеттік құрылымдармен тиімді өзара іс-қимылы жөніндегі аймақтық тәжірибелер мен аналитикалық баяндамаларын ұсынды.

Дискуссия ашық пікір алмасу форматында өтіп, қатысушыларға басым міндеттерді талқылап қана қоймай, мемлекеттік органдар, бизнес және үшінші сектор арасындағы әріптестікті одан әрі дамытуға бағытталған нақты қадамдарды ұсынуға мүмкіндік берді. Кездесу қорытындысы бойынша Президент Жолдауында көрсетілген бастамаларды жүзеге асыруға арналған нақты жобалардың негізіне айналатын және билік пен қоғам арасындағы диалогты нығайтуға ықпал ететін ұсыныстар топтамасы қабылданды.